Mae traeth y Borth yn estyn am bron i dair milltir o glogwyni Craig yr Wylfa i dwyni tywod Ynys-las.
Ar ben deheuol y traeth, mae clogwyni Craig yr Wylfa yn rhoi cysgod rhag gwyntoedd y de-orllewin. Mae gorsaf y bad achub a llithrfa’r pentref ar ben deheuol y traeth hefyd.
Ar hyd glan y môr, fe gewch chi oriau o hwyl yn chwilota yn y pyllau am grancod a chreaduriaid bach eraill. Pan fydd y llanw ar drai, cadwch lygad am olion hen goedwig gynhanesyddol sy’n adlais o chwedl Cantre’r Gwaelod, a gwrandewch yn astud i weld a allwch chi glywed clychau Cantre’r Gwaelod yn canu dan y dŵr.
Tu cefn i’r traeth, mae wal uchel yn cysylltu cyfres o grwynau sy’n estyn am bron i ddwy filltir tua’r gogledd i dwyni tywod Ynys-las ac aber llydan afon Dyfi. Pan fydd y llanw’n uchel, dim ond cerrig mân y stormdraeth fydd i’w gweld. Ond pan fydd y llanw ar drai, bydd yr olygfa’n trawsnewid, a bydd traeth euraid mawr a diogel yn ymddangos o’ch blaen.
Ynyslas
Ar ben gogleddol y traeth, bydd y grwynau rheolaidd yn dod i ben wrth i chi gyrraedd twyni tywod Gwarchodfa Natur Genedlaethol Dyfi yn Ynys-las. Gallwch chi groesi’r twyni ar hyd llwybr o gregyn a phren i gyrraedd canolfan ymwelwyr Cyfoeth Naturiol Cymru.
Gallwch chi barcio’ch car ar y tywod cadarn ar dop y traeth cysgodol i’r gogledd o’r twyni. Bydd llawer yn mynd yno i fwynhau’r olygfa fendigedig ar draws yr aber tua Aberdyfi a Chadair Idris.
Dyw hi ddim yn ddiogel i chi nofio yn Ynys-las gan fod y cerrynt yn gryf iawn yno. Ond mae’n lle poblogaidd iawn i fordhwylio a barcudfyrddio.
Gall cŵn ddefnyddio traeth Ynys-las drwy gydol y flwyddyn, ond bydd rhannau o’r traeth yn cau o bryd i’w gilydd pan fydd adar yn nythu.
