Mae traeth Penbryn, gyda’i dywod mân euraidd, yn swatio dan lethrau coediog. Yno, fe allwch chi chwilota mewn pyllau glan môr ac ogof smyglwyr. Mae hefyd yn lle hyfryd i syllu ar y sêr liw nos.
Traeth gwledig â bron i filltir o dywod meddal yw traeth Penbryn. Mae afon Hoffnant yn llifo o’r llethr coediog uwchlaw ar draws y traeth i’r môr. Gyda chysgod rhag y gwyntoedd, mae’r traeth sy’n disgyn yn raddol tua’r môr yn boblogaidd ymhlith teuluoedd.
Fe gewch chi hyd i byllau glan môr ar ben deheuol y traeth, ac ogof smyglwyr ar y pen gogleddol.
Does ryfedd iddo gael ei ddewis yn lleoliad i ffilmio diweddglo rhamantus y ffilm James Bond, Die Another Day.
I gyrraedd y traeth, gallwch chi gerdded ar hyd lôn goediog o Lanborth lle cewch chi hyd i lefydd parcio a chaffi. Ar y traeth ei hun, mae yna ardal droi i rai sydd angen mynediad anabl neu fynediad brys i’r traeth yn unig.
Gallwch chi hefyd gerdded i’r traeth drwy’r coed sy’n llawn blodau yn y gwanwyn.
Mae traeth Penbryn wedi’i leoli ar Lwybr Arfordir Cymru a Cheredigion, rhwng Tre-saith a Llangrannog.
